სოხუმის სახელმწიფო უნივერსიტეტში, 15 ოქტომბერს, ფსიქიკური ჯანმრთელობის მსოფლიო დღისადმი მიძღვნილი საინფორმაციო კვირეულის ფარგლებში, ჩატარდა პროექტით „საქართველოს უმაღლეს საგანმანათლებლო დაწესებულებებში სტუდენტებისთვის ფსიქოლოგიური კონსულტაციის ცენტრების შექმნა“ (E-PSY) დაგეგმილი შეხვედრა სსუ-ის სტუდენტებთან და თანამშრომლებთან. ღონისძიება გახსნა უნივერსიტეტის რექტორმა, პროფესორმა ზურაბ ხონელიძემ. მან თავის გამოსვლაში ისაუბრა საქართველოს სწრაფვაზე ევროპისკენ, ქართული სახელმწიფოს მიმზიდველობაზე, უნივერსიტეტების ინტერნაციონალიზაციაზე, პროექტის „საქართველოს უმაღლეს საგანმანათლებლო დაწესებულებებში სტუდენტებისთვის ფსიქოლოგიური კონსულტაციის ცენტრების შექმნა“ (E-PSY) მნიშვნელობაზე და აღნიშნა, რომ ეს პროექტი არის სსუ-ის გამარჯვება, რადგანაც უნივერსიტეტი, თავისი არსებობის მანძილზე, პირველად გახდა ევროკომისიის მიერ დაფინანსებული პროექტის კოორდინატორი.

პროექტის მიზნებსა და მოსალოდნელ შედეგებზე ისაუბრა საერთაშორისო ურთიერთობებისა და კულტურათაშორისი კავშირების სამსახურის უფროსმა, პროექტის კოორდინატორმა, პროფესორმა ინდირა ძაგანიამ. მან მადლობა გადაუხადა გუნდის წევრებს, პარტნიორებს, უნივერსიტეტის ხელმძღვანელობას იმ ძალისხმევისთვის, რომელსაც ისინი არ იშურებენ საბოლოო წარმატების მისაღწევად. ქ-ნმა ინდირამ თანადგომისთვის მადლობა გადაუხადა ერასმუს+ ეროვნულ ოფისს ქ-ნი ლიკა ღლონტის ხელმძღვანელობით.

თავის გამოსვლაში ბიზნესისა და სოციალურ მეცნიერებათა ფაკულტეტის ხარისხის სამსახურის უფროსმა, პროფესორმა კახი კოპალიანმა ყურადღება გაამხვილა ფსიქიკური ჯანმრთელობის მნიშვნელობაზე როგორც თითოეული ადამიანის ცხოვრებაში, რადგანაც ის განსაზღვრავს მისი საქმიანობის ხარისხსა და პროდუქტიულობას, ისე ზოგადად, საზოგადოების განვითარებისთვის.

დამსწრე საზოგადოებას პროექტის ფარგლებში ჩატარებული კვლევის შედეგები გააცნეს სოციოლოგიის მიმართულების ხელმძღვანელმა, პროფესორმა ხათუნა ამაღლობელმა და ასოცირებულმა პროფესორმა, ფსიქოლოგმა ნანიკო ცხვედაძემ. მათ ისაუბრეს ქვეყნის 6 რეგიონში ფსიქიკურ ჯანმრთელობაზე მომუშავე 37 ორგანიზაციის პრაქტიკის შესწავლისა და გამოკითხული 6329 სტუდენტის მონაცემების ანალიზის შედეგებზე.

დასასრულ, ღონისძიების ორგანიზატორებმა უპასუხეს სტუდენტების შეკითხვებს.

15 ოქტომბერსვე, ფსიქოლოგიის მიმართულების ხელმძღვანელმა, პროფესორმა კახი კოპალიანმა და ფსიქოლოგმა, ასოცირებულმა პროფესორმა ნანიკო ცხვედაძემ სტუდენტებისთვის ჩაატარეს სემინარი, რომლის დროსაც განიხილეს პროექტის ფარგლებში განხორციელებული კვლევის შედეგები. კერძოდ, სოხუმის სახელმწიფო უნივერსიტეტში ფსიქოლოგიური საკონსულტაციო ცენტრის გახსნასა და კვალიფიციური ფსიქოლოგიური მომსახურების მიღებაზე სტუდენტთა დამოკიდებულებები, მოლოდინები, ასევე, ფსიქიკური კეთილდღეობის, დროის დაგეგმარების, პროსკრასტინაციისკენ მიდრეკილების, კორონა ვირუსთან დაკავშირებული სუბიექტური სიტუაციის აღქმები.

კვლევაში მონაწილე სხვა უნივერსიტეტების კონტექსტში, ზემოთ ჩამოთვლილი პარამეტრების მიხედვით, მოხდა სსუ-ის სტუდენტების შედარებითი ანალიზი და მსჯელობა მსგავსება-განსხვავებებზე.